La 24-an de julio estas la datreveno de la naskiĝo (en 1783) de la venezuela generalo, patrioto, revoluciulo kaj ŝtatestro Simón José Antonio Bolívar y Palacios, simple konata kiel Simón Bolívar (1783-1830)
it.wikipedia.org/wiki/Sim%C3%B3n_Bol%C3%Advar
eo.wikipedia.org/wiki/Sim%C3%B3n_Bol%C3%Advar
nomata Libertador (Liberiganto) pro sia kontribuo al la sendependiĝo disde Hispanio de Bolivio, Kolombio, Ekvadoro, Panamo, Peruo kaj Venezuelo.
Konsiderata nacia heroo en la plimulto el la Landoj de Latinameriko (en Venezuelo kaj en Ekvadoro, la 24-a de julio estas nacia festotago), li ricevis rekonojn en multaj mondopartoj, per statuoj, monumentoj, parkoj, placoj kaj stratoj dediĉitaj al li (interalie, en Karakaso, Santiago de Ĉilio, San Salvadoro, San Francisco, Novjorko, Otavo, Parizo, Bruselo en la palaco de la Eŭropa Parlamento; en Italio, en Romo, Milano kaj Napolo).
Aparte, Romo titolis al li placon (antaŭe, “placon Menenio Agrippa”, laŭ la nomo de la aŭtoro de la fama “Apologo”) en Monte Sacro (Sankta Monto)
it.wikipedia.org/wiki/Monte_Sacro
la loko kie en 1805 Simón Bolívar faris ĉi tiun solenan ĵuron: “Mi ĵuras per la Dio de miaj prapatroj, mi ĵuras je mia honoro kaj ĵuras je mia patrujo, ke mi ne ripozigos mian brakon nek havigos pacon al mia animo, ĝis mi disrompos la katenojn, kiuj subpremas nin pro volo de la hispana povo”.
Romo dediĉis al li rajdan monumenton, verkon de Pietro Canonica, tamen ne sur la Sankta Monto, sed en la zono de “Valo Giulia”, ĉar tiutempe (1930-1934) Monte Sacro (nun dense loĝata) estis taksata tro periferia (sufiĉas pensi, ke eĉ hodiaŭ iu loko de tiu kvartalo konservas la nomon “Batteria Nomentana” – Baterio ĉe strato Nomentana, ĉar tie estis vicigita, en plena kamparo, la kanonaro defende al la urbo je nordo).
Koncerne la rilatojn kun Esperanto:
– en numero 1967-1/2, p. 19, de “L’Esperanto”, estas raportite, ke en decembro 1967 okazis ĉe la Esperantista Grupo de Torino “interesa prelego de Pedro Aguilar Solá pri la figuro de la sud-amerika heroo Simón Bolívar”;
- en 1972-1973, oficialaj kursoj de Esperanto okazis ĉe la Fakultato pri modernaj Lingvoj de la Pontifika Universitato de Medellín, Kolombio, titolita al Simón Bolívar. Pri tio raportis Radio Roma-Esperanto en la dissendo de la 6-a de majo 1973:
“La 17.an de februaro 1973-a komenciĝis oficiala esperanto-kurso en la Pontifika Universitato je nomo de Simon Bolivar, en la kolombia urbo Medellín. La kurso daŭros entute 30 horojn, tio signifas 10 horojn plimulte ol tiu de pasinta jaro, kiu montriĝis sukcesa. La lekciojn prizorgas la direktoro de la universitata fako pri modernaj lingvoj”;
- al Simón Bolívar estas titolita la junulara orkestro de Venezuelo, naskiĝinta el humaneca projekto iniciatita de Majstro Josè Antonio Abreu; pri ĝi parolis Radio Roma-Esperanto en la dissendo de la 16-a de septembro 2006:
La venezuela junulara orkestro “Simon Bolivar”, direktata de la prestiĝaj majstroj Claudio Abbado kaj Gustavo Dudamel, ludis kun sukceso ĉe Teatro “Massimo” en Palermo; la dua etapo estos Romo, ĉe la Aŭditorio “Parko de Muziko”. La formacio naskiĝas el humaneca projekto iniciatita de majstro Josè Antonio Abreu, kiu, en pli ol tridek jaroj, ebligis al pli ol ducent kvindek mil sudamerikaj geknaboj, apartenantaj al malriĉaj aŭ marĝenigitaj familioj, aliri muzikon kaj kleriĝon. El la projekto naskiĝis cent du junularaj orkestroj kaj kvindek kvin infanaj orkestroj. Antonio Sclavi, Prezidanto de la itala sekcio de UNICEF (la agentejo de Unuiĝintaj Nacioj pri Junualro) transdonis al majstro Josè Antonio Abreu la premion “Ĉe la flanko de la infanoj”, “ĉar li dediĉis sian tutan vivon al la protekto de la infanoj kaj de la adoleskantoj”.
Mi aldonas:
- la bildon de la monumento al Bolívar en Karakaso (el malnova bildkarto);
- la bildon de folieto eldonita de la Poŝto de Ekvadoro en 2016;
- la paĝon 19 de “L’Esperanto” 1967-1/2.
